Í tilefni af 27 ára starfsafmælinu fékk Ford gjöf frá HMS Host, fyrirtækinu sem sér um starfsmannamál Burger King. Ekki var um merkilega gjöf að ræða; Reese’s nammipoki, fjölnota kaffibolli frá Starbucks, tveir pennar, einn bíómiði og annað smálegt.
Myndband af Ford að opna gjafapokann vakti mikla athygli þegar það fór í dreifingu og í kjölfarið var brugðið á það ráð að hefja söfnun fyrir hann. Var það dóttir hans sem hafði veg og vanda að því og fannst henni heldur illa komið fram við föður sinn sem hafði sýnt skyndibitakeðjunni mikla tryggð og fært ýmsar fórnir í lífi sínu fyrir bæði fyrirtækið og dætur sínar.
Það er skemmst frá því að segja að það söfnuðust 470 þúsund dollarar fyrir hann, eða 64,5 milljónir króna.
Ford dró ekki fjöður yfir það að það væri gott að vinna hjá Burger King en ef til vill hefði fyrirtækið misst tengingu við starfsfólk sitt á síðustu árum. Áður hafi starfsmenn fengið ávísanir eða gjafakort á starfsafmælum og taldi hann að bíómiðinn væri slíkt kort.
„Ég var alveg: „Hey ég fékk loksins kortið mitt“ en svo sá ég að þetta var bíómiði og ekki einu sinni tveir miðar […] Það var eins og þeir gæfu mér bara dót sem þeir áttu nú þegar og settu saman í einn poka.“
New York Post greinir frá því í dag að líf Fords hafi tekið talsverðum breytingum eftir að fjallað var um mál hans fyrr í sumar. Nú hefur Ford ákveðið að hefja nýjan kafla í lífi sínu og ætlar hann að opna matarvagn ásamt dóttur sinni.
Hann keypti sér fullbúinn matarvagn frá Kína á 2,7 milljónir króna og er nú unnið að því að innrétta hann. Kveðst Ford ætla að bjóða upp á hamborgara og pylsur og þá vonast hann til þess að geta boðið upp á mat frá Filippseyjum, til að heiðra kærustu sína sem er þaðan. Dóttir hans er lærður kokkur og munu þau eflaust vekja athygli á götum Nevada.
