Pawel Bartoszek, borgarfulltrúi Viðreisnar, er æfur vegna þess að stjórnvöld látið það óátalið að svikahrappar noti nöfn og ásjónu ráðherra í fjársvikum á Facebook. Vill hann að stjórnvöld kalli forsvarsmenn samfélagsmiðilsins til ábyrgðar.
„Hvaða aumingjaskapur er það í íslenska ríkinu að láta svona endalaust magn „Þúsundir íslendinga eru að missa af þessari glufu“. Og „frægt fólk vill ekki að þú vitir af þessu!“ spammi. Með myndum af forsætisráðherranum okkar og alles,“ segir Pawel í færslu á samfélagsmiðlum.
Birtir hann tvö skjáskot af slíku svindli með færslunni. Þar sem meðal annars má sjá (nokkuð gamla) mynd af Bjarna Benediktssyni.
„Þetta er ekki að gerast á einhverjum síðsovéskum darkweb [myrkravef] síðum heldum Facebook,“ segir Pawel og eggjar stjórnvöld til aðgerða. „Hvernig væri að kalla stjórnendur þessa miðils í skýrslutöku, gefa út stefnu / ákæru og fara fram á eðlilegar skaðabætur í hlutfalli við veltu fyrirtækisins.“
Að lokum segir Pawel internetið sem slíkt vera frábært en einhver verði að standa í lappirnar gegn augljósu svindli.
