Lögreglan á Suðurlandi rannsakar alvarlegt ofbeldisbrot í uppsveitum Árnessýslu. Þetta kemur fram í tilkynningu frá embættinu.
Málið varðar meinta frelsissviptingu, líkamsárás og fjárkúgun í heimahúsi í Reykholti í Biskupstungum. Hafa þrír karlmenn og ein kona setið í gæsluvarðhaldi vegna málsins og hefur gæsluvarðhaldið verið framlengt til 24. maí.
Tilkynningin er eftirfarandi:
„Rannsókn á alvarlegu ofbeldisbroti í uppsveitum Árnessýslu
Lögreglan á Suðurlandi er með til rannsóknar meinta frelsissviptingu, líkamsárás og fjárkúgun í heimahúsi í Reykholti. Þrír karlmenn og ein kona hafa sætt gæsluvarðhaldi vegna málsins. Gæsluvarðhaldið var nú síðastliðinn föstudag framlengt til 24. maí næstkomandi og er á grundvelli rannsóknarhagsmuna. Málið kom upp í lok apríl og er sá er misgjört var við erlendur ríkisborgari sem hefur verið hér á landi í langan tíma. Allir grunaðir í málinu eru Íslendingar.
Lögreglan á Suðurlandi fer með rannsókn málsins og hefur notið aðstoðar lögreglunnar á Höfuðborgarsvæðinu, embættis Ríkislögreglustjóra og embættis Héraðssaksóknara.
Rannsókn málsins er enn í fullum gangi og er lögreglu því ekki unnt að veita frekari upplýsingar um málið.“
