Berglind fór þá á stúfana og spurði vegfarendur út í páskahátíðina og var með stærðarinnar kross með sér. Meðal þeirra sem gagnrýndu Berglindi og Gísla Martein voru prestshjónin Bjarni Karlsson og Jóna Hrönn Bolladóttir sem gerðu það í aðsendri grein á Vísi.
Í morgun birtist grein eftir Árnýju Björg Blandon á sama vettvangi þar sem hún gagnrýnir innslagið.
„Mikið væri gaman að vita hvað hefði gerst í þættinum Vikan með Gísla Marteini, ef önnur trúarbrögð hefðu verið tekin fyrir, gert grín að þeim og hlegið dátt? Þá hefði Rúv sjálfsagt verið kennt um rasisma, og fordóma, jafnvel ofbeldi. Sem er eðlilegt. Er í lagi að hæða kross Jesú Krist og kristna trú sem er arfur okkar Íslendinga? Og rétt fyrir páskahátíðina í þokkabót!“
Árný veltir fyrir sér hvort RÚV og Gísli Marteinn hafi vitað af því að Berglind Pétursdóttir ætlaði að taka fyrir kristna trú og gera grín að henni.
„Fyrirgefið, en ég skil þetta engan veginn enda held ég að mörgum Íslendingum hafi ekki stokkið bros [á] vör. Aðrir kannski verið meðvirkir. Og kynslóðir sem hafa ekki hugmynd um af hverju við höldum páska fundist þetta fyndið af því að mörg þeirra þekkja ekki ástæðuna fyrir því að við höldum þessa heilögu hátíð.“
Árný segir að RÚV, Gísli Marteinn og Berglind megi alveg biðjast afsökunar, jafnvel fyrirgefningar, á þessu innleggi sínu.
„Það myndi sýna smá manndóm, eftirsjá og virðingu fyrir þeim sem ganga inn í þessa páskahátíð full þakklætis fyrir það sem Jesús Kristur gerði með krossdauða sínum og upprisu.“
