Þórdís Kolbrún Gylfadóttir Reykfjörð fjármálaráðherra er ómyrk í máli vegna kaupa Landsbankans á 100 prósenta hlut í tryggingafélaginu TM. Greint var frá því um helgina að stjórn Kviku banka hefði ákveðið að taka tilboði Landsbankans um kaup á TM fyrir 28,6 milljarða króna. Þetta vekur athygli í ljósi þess að ríkið er eigandi Landsbankans.

Þórdís Kolbrún skrifaði Facebook-færslu í gærkvöldi þar sem hún benti á að í stjórnarsáttmála ríkisstjórnarinnar sé kveðið á um að stjórnvöld muni halda áfram að draga úr eign­ar­haldi rík­is­ins í fjár­mála­kerf­inu og nýta fjár­muni sem liggja í slík­um rekstri í upp­bygg­ingu innviða.

„Eigendastefna ríkisins fyrir fjármálafyrirtæki er samhljóða og þar er meðal annars kveðið á um stuðla skuli að samkeppni í fjármálastarfsemi. Ég hef lagt mikla áherslu á að þessari stefnu sé fylgt eftir og á næstu dögum mæli ég fyrir um frumvarp um sölu eftirstandandi hlutar ríkisins í Íslandsbanka,“ sagði hún í færslu sinni og hélt áfram:

„Þrátt fyrir allt þetta mun Landsbankinn, sem er í tæplega 100% í eigu ríkisins en eigendastefna kveður á að draga eigi úr eignarhaldi ríkisins þar, að óbreyttu stækka og stíga afgerandi inn á nýjan markað með kaupum á stóru fyrirtæki á markaði, TM.“

Þórdís segir að ríkisfyrirtæki eigi ekki að kaupa tryggingafélag. Ríkið eigi að losa um tugi milljarða og umbreyta þeim í samfélagslega innviði sem almenningur nýtur góðs af og byggir undir frekari verðmætasköpun og samkeppnishæfni allra landshluta.

„Kröftum okkar er betur borgið í öðrum fjárfestingum en í tryggingastarfsemi, sem af mér vitandi enginn hefur kallað eftir að sé í ríkisrekstri,“ segir hún.

„Þessi viðskipti verða ekki að veruleika með mínu samþykki, nema söluferli Landsbankans hefjist samhliða. Ég hef óskað skýringa á málinu frá Bankasýslu ríkisins sem heldur um eignarhluti ríkisins í bankanum og setur almenn viðmið um áherslur í rekstri auk þess að fylgja eftir eigendastefnu ríkisins.“