Guðrún skrifaði aðsenda grein sem birtist á vef Vísis í gærkvöldi en tilefnið er hörð gagnrýni sem komið hefur á fyrirtækið vegna samstarfs Krónunnar við Wok On.
Sjá einnig: Ólafur allt annað en sáttur: „Aumingjagangur Krónunnar er ótrúlegur“
Ólafur Hauksson, almannatengill og hluthafi í Festi hf., móðurfélagi Krónunnar, skrifaði harðorða grein á Vísi í gær þar sem hann sagði að stjórnendur Krónunnar hefðu valið að setja viðskiptavini sína í hættu frekar en að þurfa að borga mögulegar skaðabætur.
Gerði Ólafur viðtal við Ástu Fjeldsted, forstjóra Festis, í Morgunblaðinu á mánudag að umtalsefni en í viðtalinu sagði Ásta að Krónan hafi reynt að losna út úr samningum við Wok On. Lögregla réðst sem kunnugt er í umfangsmiklar aðgerðir á dögunum vegna vegna gruns um peningaþvætti, mansal og skipulagða brotastarfsemi.
Sagði Ásta að Krónan hafi sagt upp samningum við Wok On í nóvember í fyrra og reynt að koma sér út úr honum síðan þá. Af lagalegum ástæðum hefði það verið erfitt því Krónan þá verið bótaskyld, enda 12 mánaða uppsagnarákvæði verið í samningnum.
Ólafur gagnrýndi þetta harðlega og sagði að Krónan hafi ákveðið að selja viðskiptavinum vafasaman mat í fjóra mánuði til viðbótar, allt þar til lögregla gerði rassíuna fyrir viku síðan.
Guðrún áréttar í grein sinni á Vísi í gærkvöldi að samningnum við Wok On hafi verið sagt upp í nóvember síðastliðnum með samningsbundnum uppsagnarfresti.
„Var þetta gert í kjölfar fregna af matvælalagernum í Sóltúni. Á þessum tímapunkti lá ekki fyrir það sem komið hefur fram í fjölmiðlum síðustu daga um rekstur þessara staða; rökstuddur grunur um mansal og annað glæpsamlegt athæfi. Þegar það lá fyrir var stöðunum lokað, samningi rift og merkingar teknar niður,“ segir Guðrún.
Hún bendir einnig á að Wok On hafi verið rekið af sjálfstæðum rekstraraðilum og á eigin starfsleyfi. Tiltekið hafi verið í yfirlýsingu frá Wok On í nóvember að eigandi lagersins í Sóltúni kæmi ekki að rekstri Wok On-staðanna og að birgjar væru allt viðurkenndir aðilar.
„Það sama var gert á fundum með Krónunni, þar sem stjórnendur Krónunnar voru fullvissaðir um að engin matvæli frá umræddum matvælalager hefðu komið inn á stað Wok On í Krónunni. Að auki staðfestu þáverandi forsvarsmenn Wok On að staðurinn uppfyllti öll skilyrði um heilnæmi og meðferð matvæla en það kemur skýrt fram í samningum Krónunnar að heilbrigðisreglugerðum skuli fylgt í hvívetna af hálfu rekstraraðila. Krónan treysti því að starfsleyfi Wok On yrði afturkallað ef starfsemin uppfyllti ekki skilyrði Heilbrigðiseftirlitsins.“
Guðrún segir að Krónan hafi gripið til allra þeirra samningsbundnu og lagalegu úrræða sem hafa verið tæk á hverjum tíma með velferð viðskiptavina að markmiði. Segir hún að það sé því fjarstæðukennt að halda því fram að Krónan hafi fórnað hagsmunum viðskiptavina sinna til að forða Krónunni frá hugsanlegri skaðabótaskyldu.
„Við sjáum það núna í ljósi þessa hörmulega máls að Krónan þarf að gera ítarlegri kröfur á þá sem reka sjálfstæð veitingarými innan verslana varðandi upplýsingagjöf úr niðurstöðum Heilbrigðiseftirlitsins. Krónan mun gera þessar niðurstöður sýnilegar viðskiptavinum staðanna þannig að öllum verði ljóst áður en þeir versla á viðkomandi stöðum hvaða einkunn þeir fá frá Heilbrigðiseftirlitinu. Krónan fagnar auknu gagnsæi og hvetur aðrar matvöruverslanir, mathallir og veitingastaði til að gera slíkt hið sama.“
