Inga Sæland, alþingismaður og formaður Flokks fólksins, segir að stjórnvöld hér á landi séu haldin fordómum því fíknisjúkdómurinn sé ekki viðurkenndur hér á landi sem heilbrigðisvandamál.

Inga gerir þetta að umtalsefni í aðsendri grein í Morgunblaðinu í dag en í gær var hún með sérstaka umræðu á Alþingi um fíknisjúkdóminn. „Banvænasta og al­var­leg­asta sjúk­dóm sem herj­ar á sam­fé­lagið um þess­ar mund­ir. Við erum að tala um sjúk­dóm sem hef­ur orðið um hundrað ein­stak­ling­um að ald­ur­tila ár­lega,“ segir Inga.

Munu deyja á biðlista

Hún bendir á að hátt í 700 ein­stak­ling­ar sitji á biðlista eft­ir lækn­is­hjálp inn á sjúkra­húsið Vog. Marg­ir þeirra muni deyja í bið eft­ir lífs­nauðsyn­legri lækn­is­hjálp og þúsund­ir aðstand­enda standi ráðþrota með fár­veika ást­vini sína í fang­inu þar sem al­gjört úrræðal­eysi rík­ir í for­dóma­fullu kerfi sem viður­kenn­ir fíkni­sjúk­dóm­inn ekki sem heil­brigðis­vanda­mál.

„Þvert á móti er blinda aug­anu snúið að varn­ar­leysi og sorg þeirra sem eru að bug­ast und­an álagi sem eng­inn á að þurfa að búa við í okk­ar ríka landi. Flest­ir sem deyja af völd­um fíkni­sjúk­dóms­ins eru yngri en 50 ára. Þar af eru tug­ir und­ir þrítugu og allt niður í 15 ára börn sem hafa dáið af völd­um eit­urs sem þau neyttu án þess að vita að það gæti kostað þau lífið.“

Galin forgangsröðun

Inga spyr hver þekki ekki möntruna um snemmtæka íhlutun en hún felur í sér að gripið er inn í hvers konar vanda eins fljótt og örugglega og mögulegt er til að leysa hann áður en í óefni er komið.

„Hvernig má það þá vera að dauðans al­vöru sjúk­dóm­ur sé horn­reka í sam­fé­lag­inu? Hvernig stend­ur á því þegar fár­veik­ur ein­stak­ling­ur hring­ir inn á sjúkra­húsið Vog og biður um hjálp að hon­um sé sagt að bíða og oft mánuðum sam­an? Hvernig má það vera að rúm­ir tveir millj­arðar króna eru sett­ir í snobbpartí í Hörpu sl. vor sem er hærri upp­hæð en sett var allt árið 2023 í all­ar fíkni­meðferðastofn­an­ir lands­ins? Hvurs lags for­gangs­röðun fjár­muna er það?“

Inga vísar þarna í leiðtogafund Evrópuráðsins sem haldinn var hér á landi síðastliðið vor. Hér má sjá kostnaðinn við fundinn. Inga segir í grein sinni að stjórnvöld þykist ekki vera haldin fordómum en það sé rangt.

„Ef fíkni­sjúk­dóm­ur­inn væri viður­kennd­ur sem sá dauðans al­vöru sjúk­dóm­ur sem hann er, þá væru 700 ein­stak­ling­ar ekki að bíða eft­ir lífs­nauðsyn­legri lækn­is­hjálp. Þá væru ekki um 100 dauðsföll á ári bein­lín­is af völd­um sjúk­dóms­ins. Þá væri ekki fólk að deyja á biðlist­um eft­ir lækn­is­hjálp. Þá hefðu ekki um 50 ein­stak­ling­ar, allt niður í óharðnaða ung­linga, dáið ótíma­bær­um dauða ár­lega. Án for­dóma væru stjórn­völd löngu búin að byggja upp heild­stætt sér­hæft kerfi til bjarg­ar öll­um þeim sem glíma við sjúk­dóm­inn og biðja um hjálp. For­dóm­ar og aft­ur for­dóm­ar hafa orðið til þess að unga fólkið okk­ar deyr ótíma­bær­um dauða og jafn­vel á biðlist­um eft­ir hjálp.“