Matvælastofnun (MAST) hefur kært til lögreglu atvik þar sem starfsfólki stofnunarinnar var hótað við reglubundið eftirlit hjá fyrirtæki.

Þetta kemur fram á vef MAST.

Í tilkynningunni segir að allt ofbeldi og hótanir í garð starfsmanna stofnunarinnar verði kært til lögreglu. Ennfremur segir:

„Í almennum hegningarlögum segir að hver sá sem ræðst með ofbeldi eða hótunum um ofbeldi á opinberan starfsmann þegar hann er að gegna skyldustarfi sínu eða sem á sama hátt leitast við að hindra framkvæmd slíks starfs skal sæta fangelsi allt að 6 árum. Jafnframt segir að beita megi sektum ef brot er smáfellt.“