Þrítugur matreiðslumaður, Theodór Páll Theodórsson, hefur verið dæmdur í 7 ára fangelsi fyrir fjölmörg kynferðisbrot. Þetta staðfestir Karl Ingi Vilbergsson, saksóknari hjá Embætti héraðssaksóknara, en dómurinn hefur ekki verið birtur á vefsíðu dómstólanna. Var dómurinn kveðinn upp þann 12. janúar síðastliðinn.
DV greindi ítarlega frá málum Theodórs í nóvember á síðasta ári. Var hann ákærður fyrir tíu kynferðisbrot, þar af voru mörg þeirra gegn tveimur 14 ára stúlkum. Hann var einnig ákærður fyrir vændiskaup af konum yfir lögaldri. Í gæsluvarðhaldsúrskurði yfir Theodór kom fram að brot hans beindust gegn mjög ungum stúlkum í viðkvæmri stöðu en stúlkurnar voru báðar virkar í áfengisneyslu. Hann seldi áfengi í gegnum Snapchat og tældi þær til að hitta sig í gegnum þau samskipti. Greiddi hann þeim fyrir kynlíf með áfengi og reiðufé. Í úrskurðinum kemur fram að framburður stúlknanna hjá lögreglu hafi verið mjög trúverðugur og studdur gögnum út t.d. öryggismyndavélum. Einnig fundust lífsýni af stúlkunum í bíl hans sem studdu framburð þeirra um að hann hafi brotið gegn þeim kynferðislega.
DV greindi einnig frá því að Theodór væri sakaður um fleiri kynferðisbrot en þau sem voru til umfjöllunar í réttarhöldunum við Héraðsdóm Reykjavíkur. Hann var meðal annars kærður fyrir brot gegn grunnskólanemanda í í skóla á Norðurlandi þar sem hann starfaði sem matreiðslumaður í mötuneyti skólans. Átti það atvik sér stað árið 2021 og er enn til rannsóknar, en brotin sem Theodór var dæmdur fyrir í janúar voru framin sumarið 2023.
Theodór Páll, sem er þrítugur að aldri, hefur undanfarin ár starfað sem matreiðslumaður á ýmsum þekktum veitingastöðum. Hann hefur einnig skrifað fjölmargar greinar um matreiðslu og veitingahús á vefnum Veitingageirinn.
Samkvæmt upplýsingum frá Héraðsdómi Reykjavíkur verður dómurinn yfir Theodór birtur bráðlega og mun DV fjalla nánar um hann síðar.
