Slysavarnadeildin Ársól á Reyðarfirði hefur verið tekin til gjaldþrotaskipta. Ástæðan er sú að ekki voru skráðir raunverulegir eigendur að baki félaginu.
Deildin er hluti af, en samt aðskilin frá, björgunarsveitinni Ársól. Illa hefur gengið að manna starf slysavarnardeildarinnar á undanförnum árum og því hefur starfsemin legið niðri.
Ekki var samt ásetningur björgunarsveitarinnar að leggja deildina niður heldur átti hún að vera í hvíld þar til tækist að lífga starfið við að nýju. En eins og flestir vita þá er starf björgunarsveitanna sjálfboðaliðastarf.
Í vor var hins vegar óskað eftir gjaldþrotaskiptum á slysavarnadeildinni og frestur gefinn til 29. maí. Þann 7. júní var búið svo tekið til gjaldþrotaskipta með úrskurði Héraðsdóms Austurlands. Skiptastjóri hefur nú óskað eftir kröfum í búið og verður félaginu slitið þann 20. nóvember.
Samkvæmt heimildum DV orsakast gjaldþrotið af skráningarklúðri. Fjárhagur slysavarnadeildarinnar jafnt sem björgunarsveitarinnar sé traustur.
Árið 2019 voru sett lög um skráningu raunverulegra eigenda að félögum, lög sem byggð voru á Evrópureglugerð sem ætlað var að tryggja gegnsæi og eru hluti af aðgerðapakka Evrópusambandsins til að takast á við peningaþvætti og fjármögnun hryðjuverka.
Björgunarsveitinni láðist að skrá raunverulega eigendur fyrir slysavarnadeildina og illa hefur gengið að lagfæra mistökin. Er því deildin að hverfa af bókum björgunarsveitarinnar núna.
