Gunnar Smári Egilsson, fjölmiðlamaður og einn helsti forystumaður Sósíalistaflokks Íslands, ritaði fyrr í dag færslu á Facebook-síðu sína þar sem hann færir Davíð Oddssyni, ritstjóra Morgunblaðsins og fyrrverandi forsætisráðherra og formanni Sjálfstæðisflokksins, þakkir.

Tilefnið eru skoðanapistillinn Staksteinar sem birtist í Morgunblaðinu í morgun. Þar er vitnað í dálkinn Huginn og Muninn í nýjasta tölublaði Viðskiptablaðsins þar sem fjallað er um fjölmiðilinn Samstöðin sem Gunnar Smári hefur verið í forystu fyrir:

„Dálkur Hugins og Munins í Viðskiptablaðinu gerir nýjasta ríkisfjölmiðilinn að umræðuefni, en ekki er þó víst að hann sé vel til þess fallinn að auka fjölbreytni, gagnsæi og fjölræði í fjölmiðlum, líkt og stjórnvöld segjast vilja leggja allt kapp á.“

Vísa Staksteinar til þess að Gunnar Smári hafi áður sagt að hluti framlaga sem Sósíalistaflokkurinn fékk úr ríkissjóði vegna árangurs síns í Alþingiskosningunum 2021 myndi renna til þess að fjármagna róttæka fjölmiðlun.

Gunnar Smári svarar Staksteinum, sem ekki er ritaðir undir nafni, með því að taka verk ritstjórans Davíðs fyrir. Hann rifjar upp átök Fréttablaðins við Davíð á upphafsárum þess þegar Gunnar Smári var ritstjóri blaðsins og Davíð var forsætisráðherra.:

„Þegar Fréttablaðið hóf göngu sína 2001 varð óvild Davíðs Oddssonar gagnvart blaðinu helsta eign þess. Við þurftum rétt aðeins að stríða Davíð og þá gaus upp í honum ólundin og hann tók að hrakyrða blaðið. Þetta vakti bæði athygli á Fréttablaðinu og gerði það spennandi. Þegar blaðið lá í forstofunni skalf það pínulítið og dró athygli fólks að sér. Þetta var fyrst og fremst verk Davíðs, sem þoldi ekki fjölmiðla sem ekki bugtuðu sig fyrir honum og beygðu í öllum málum.“

Gunnar Smári gleðst yfir því að honum sýnist sem að Davíð ætli að sýna Samstöðinni sömu góðvild:

„Mér sýnist Davíð og hirð hans ætla að færa Samstöðinni sömu gjöf. Það er alveg hreint magnað hvað þessi litli fátæki miðill fer mikið í taugarnar á Davíð. Og reyndar líka Bjarna Benediktssyni, sem vill afnema styrk til Sósíalistaflokksins vegna þess að flokkurinn hefur látið hluta hans renna til Samstöðvarinnar. Og svo éta þeir upp þessa óvild upp sem skottast í kringum þessa karla, en þó kannski fyrst og fremst auðfólkið sem rekur þessa karla, heldur Davíð úti sem húskarli.“

Að lokum er Gunnar Smári með einföld skilaboð til Davíðs Oddssonar:

„Ég segi bara: Takk Davíð, fyrir allt sem þú hefur gefið mér.“