Yevgeny Prigozhin, leiðtogi Wagner-málaliðafyrirtækisins, segir það „hneyksli“ að úkraínskum hersveitum hafi tekist að endurheimta hluta af bænum Berkhivka, sem er norðan við Bakhmut.

Reuters segir að Prigozhin hafi sagt að úkraínskar hersveitir hafi náð hluta af bænum á sitt vald á nýjan leik og að það sé „hneyksli“.

Málaliðar Prigozhin náðu bænum Bakhmut á sitt vald í maí og létu rússneskum hersveitum síðan eftir yfirráð yfir bænum.  Harðir bardagar höfðu þá staðið yfir um bæinn mánuðum saman og telja vestrænir sérfræðingar að Rússar hafi misst tugi þúsunda hermanna þar.