Georgíumenn fundu sjálfir fyrir því árið 2008 hvernig það er að rússneskir hermenn streymi inn yfir landamærin. En samt sem áður eru lög landsins á þann veg að þau gera Rússum auðvelt fyrir að flytja til landsins og vinna þar. CNN skýrir frá þessu.
CNN segir að þetta sérkennilega samband ríkjanna endurspeglist í ansi blönduðum móttökum Georgíumanna eftir því sem rússneskir innflytjendur sögðu í samtali við miðilinn.
Einn sagði að sumir séu hlýir og gestrisnir en aðrir biðji innflytjendurna að hafa sig á brott hið fyrsta.
Annar sagði að á sumum veitingahúsum hafi hann verið beðinn um að skrifa undir skjal þess efnis að hann sé á móti Pútín. „Ef þá grunar að þú sért Rússi, þá láta þeir þig skrifa undir skjal þar sem segir „ég er á móti Pútín og því sem hann gerir,“ sagði viðkomandi og bætti við að ef fólk vilji ekki skrifa undir fá það ekki aðgang.
