Dmitry Medvedev, fyrrum forseti Rússlands og náinn bandamaður Vladímír Pútíns, forseta, er allt annað en sáttur við að Alþjóðasakamáladómstóllinn hafi gefið út handtökuskipun á hendur Vladímír Pútín.

Að sögn Sky News kom hann með þungorða aðvörun vegna þess. Í langri færslu á Telegram gagnrýndi Medvedev dómstólinn fyrir að hafa gefið út handtökuskipun á hendur Pútín en dómstóllinn sakar hann um að bera ábyrgða á stríðsglæpum í Úkraínu.

Medvedev, sem er þekktur fyrir harðorðar yfirlýsingar og fyrir að hafa í hótunum um beitingu kjarnorkuvopna, skrifaði að dómstóllinn hafi ákveðið að hefja málarekstur gegn forseta kjarnorkuveldis, sem á ekki aðild að dómstólnum á sama grundvelli og Bandaríkin og önnur ríki.

„Afleiðingarnar fyrir alþjóðalög verða gríðarlegar,“ skrifaði hann og sagði handtökuskipunina marka „hrun“ lagalegra lögmála.

„Nú vill enginn snúa sér til alþjóðastofnana, allir muni semja sín á milli. Allar heimskulegar ákvarðanir SÞ og annara álíka stofnana munu bresta. Dapurlegt hrun alls kerfis alþjóðlegra skuldbindinga er í uppsiglingu. Traustið er horfið,“ skrifaði hann.