Gæsluvarðhald yfir karlmanni um þrítugt, sem grunaður er um að hafa hleypt af skoti inn á Dubliners á sunnudaginn, hefur verið framlengt.

Maðurinn var handtekinn á mánudag og var úrskurðaður í gæsluvarðhald til dagsins í dag, en það hefur nú verið framlengt til 22. mars.

Að sögn lögreglu miðar rannsókn málsins vel.

Sérsveit ríkislögreglustjóra var kölluð út á sunnudag og var með mikinn viðbúnað við skemmtistaðinn Dubliners við Naustin 1. Að sögn sjónarvotta var þar hleypt af haglabyssu.

„Hann kom þarna inn með covid-grímu og hafði rætt stuttlega við starfsfólk um að komast á efri hæðina sýndist mér,“ sagði sjónarvottur sem DV ræddi við.

„Svo virðist hann hafa miðað þarna efst á barinn og hleypt af og hljóp svo út.“

Sjónarvottur greindi frá því að högl hafi fundist í vegg og skilti sem hékk ofan við bar veitingastaðarins. 

Sjá einnig: Hleypt af byssuskoti á Dubliner – Sérsveitin að störfum á vettvangi