Jarðskjálfti upp á 7,8 reið yfir Tyrkland og Sýrland í nótt. Hann átti upptök sín nærri milljónaborginni Gaziantep í samnefndu héraði að sögn bandarísku jarðfræðistofnunarinnar USGS. Skjálftinn átti upptök sín á 17,9 km dýpi. Skömmu eftir að hann reið yfir fylgdi eftirskjálfti upp á 6,7. Nú þegar hefur verið staðfest að 100 hafi látist en óttast er að dánartalan eigi eftir að hækka mjög mikið.

Í tyrkneska héraðinu Malatya hafa 23 fundist látnir, 420 slasaðir og 140 byggingar hrundu að sögn tyrknesku Anadolu fréttastofunnar.

Í Osmaniye héraði hrundu 34 byggingar og minnst fimm létust.

Í Sanliurfa héraði, sem er nærri sýrlensku landamærunum, hafa 10 fundist látnir.

Í Sýrlandi hefur verið staðfest að 42 hafa fundist látnir og rúmlega 200 slasaðir hafa fundist. Þar hrundu byggingar í Aleppo og Hama.

Á upptökum og myndum á samfélagsmiðlum má sjá hrunin hús í mörgum borgum og bæjum í Tyrklandi.

Skjálftinn fannst í Líbanon, Sýrlandi, Kýpur og Ísrael.

Tyrkland er mjög virkt jarðskjálftasvæði og þar hafa margir látist í slíkum hamförum í gegnum tíðina. 1999 létust 17.000 manns í skjálfta upp á 7,4.

Uppfært klukkan 07.07

Samkvæmt fréttum erlendra miðla þá hafa um 600 fundist látnir.