Útgerðarmaðurinn Guðmundur Kristjánsson, jafnan kenndur við Brim, hefur keypt jarðirnar Daðastaði, Arnarstaði og Arnarhól í Öxarfirði. Þetta staðfestir Guðmundur í samtali við DV. Jarðirnar eru alls um 7.000 hektarar en þar hefur um árabil verið rekið stórt sauðfjárbú auk þess sem ábúendur hafa látið til sín taka í skógrækt hin síðari ár. Segist Guðmundur ætlar að halda því góða starfi áfram.
Jarðirnar voru auglýst til sölu í ágústlok í fyrra og var óskað eftir tilboði í eignina og allt sem henni fylgir, sauðfé, kvóta og vélum. Kaupverð eignarinnar liggur ekki fyrir en reikna má með að það sé ekki undir 150 milljónum króna.
Í samtali við DV talar Guðmundur afar hlýlega um fyrri eiganda, Gunnar Einarsson, og það starf sem unnið hefur verið á jörðinni. „Gunnar og fjölskylda hans hafa búið hér í 40 ár og hafa unnið afar gott starf. Þau hafa sérstaklega sýnt fram á það að skógrækt og sauðfjárrækt geta vel farið saman með beitarstýringu,“ segir Guðmundur.
Eins og alþjóð veit er Guðmundur þekktur fyrir aðkomu sína að sjávarútvegi og því eru það nokkur tíðindi að hann ætli að hasla sér völl í landbúnaði. Hann segir þó að kapp sé best með forsjá og hann hafi ekki augastað á fleiri jörðum. „Ég held að það sé best að byrja rólega. Ég hef mikla trú á íslenskum landbúnaði, eða í raun matarlandinu Íslandi“ segir Guðmundur.
Hann ætlar ekki að búa á Daðastöðum reiknar þó með því að vera þar með annan fótinn. Hversu mikið muni ráðast af heilsu hans næstu áratugina. Ráðsmaður muni sjá um dagleg störf á jörðinni.
Athygli vekur að jarðirnar sem Guðmundur keypti eru í bakgarði jarðanna Núps og Akursels þar sem að Samherji rekur umfangsmikið fiskeldi á landi. Fyrst keypti fyrirtækið skika úr Núpsmýri sem tilheyrði Núpi en Daðastöðir á norðurhluta mýrinnar. Síðar var jörðin Akursel keypt svo hægt væri að bora eftir meira vatni fyrir stöðina í kjölfar þess að ráðist var í umfangsmikla fjárfestingu þar sem starfsemin verður tvöfölduð.
Aðspurður segist Guðmundur ekki hafa í hyggju að láta til sín taka í landeldi. „Nei, eins og þú segir þá er Samherji með umfangsmikla eldisstarfsemi þarna auk þess sem Rifós er með fiskeldi á Kópaskeri. Ég held að það sé alveg nóg fyrir þetta litla svæði,“ segir Guðmundur.
