Það hefur færst mjög í vöxt á undanförnu árum að launafólk þurfi að vera frá vinnu til að sinna nákomnum ættingjum sínum, öldruðum foreldrum til dæmis.

Ragnar Þór Ingólfsson, formaður VR, segir að útvíkkun veikindaréttar þannig að hann nái til nánustu aðstandenda sé að finna í kröfugerð félagsins fyrir komandi kjarasamninga.

Morgunblaðið greinir frá þessu í dag.

Þar kemur fram að forystumenn stéttarfélaga meti það svo að skortur á úrræðum í þjónustu við aldraða og staðan á hjúkrunarheimilum með sínum löngu biðlistum eigi hlut að máli. Það hafi færst í vöxt að fólk þurfi að taka sér frí frá vinnu til að sinna öldruðum foreldrum sínum í heimahúsi.

Þórarinn Eyfjörð, formaður Sameykis, varpar frekara ljósi á þetta í samtali við Morgunblaðið.

„Við höf­um séð dæmi um hjón sem eru kom­in í mikið umönn­un­ar­hlut­verk gagn­vart for­eldr­um beggja og ann­ast þá allt upp í fjóra aldraða ást­vini, sem eru á biðlist­um og fá ekki þá þjón­ustu sem þeir þurfa á að halda. Þetta teng­ist beint umræðunni í sam­fé­lag­inu um slaka stöðu hjúkr­un­ar­heim­ila og kem­ur fram á öll­um fund­um hjá okk­ur.“

Ragnar Þór er sammála þessu og segir að hjúkrunarheimili séu yfirfull og þar sé aðeins pláss fyrir allra veikustu einstaklingana.

„Þetta er bara af­leiðing af ára­tuga van­rækslu á þess­um innviðum okk­ar sem voru byggðir hér upp af öfl­ugu fólki en síðan hef­ur þessi hluti vel­ferðar­kerf­is­ins verið al­ger­lega van­rækt­ur. Þetta bitn­ar á fjöl­skyldumeðlim­um sem þurfa að fara í þessi umönn­un­ar­hlut­verk.“