Meðal þeirra sem fylgjast spenntir með af áhuga er Henning Andersen, danskur eldfjallafræðingur, sem segir að í raun sé ekki enn vitað hversu umfangsmikið gosið verður. Þetta sagði hann í samtali við TV2 og bætti við að næstu átta til tíu dagar verði afgerandi varðandi framvindu gossins.
„Þetta kom ekki á óvart. Íslendingar hafa beðið lengi eftir þessu og búið var að flytja fólk frá Grindavík áður en gosið hófst. Nú verðum við að bíða og sjá hver niðurstaðan verður og það verður spennandi,“ sagði hann.
Thomas Kokfelt, jarðfræðingur hjá dönsku jarðfræðistofnuninni GEUS, sagði að stóra spurningin nú sé hversu lengi gosið muni vara og hvert hraunið streymi. „Eins og staðan er núna, þá flæðir það til norðausturs. Það er óhætt að segja að það sé staður þar sem engir innviðir eru, svo það er gott,“ sagði hann í samtali við TV2.
Hann sagði að eins og er þá sé það hæð í landslaginu sem valdi því að hraunið getur ekki streymt beint niður í Grindavík en það sé of snemmt að fullyrða að það geti ekki breyst. „Ef sprungan opnast lengra til suðurs, þá getur hún farið yfir hæðina og þá getur hraunið runnið beint að Grindavík. Þetta er versta sviðsmyndin sem við verðum að skoða nánar,“ sagði hann.
