Ennþá eru taldar líkur á eldgosi á Reykjanesskaga en líklegasti staðurinn núna er svæði austan við Sýlingarfell. Þetta kemur fram í tilkynningu á vef Veðurstofunnar.
Skjálftavirkni hefur farið minnkandi undanfarna tvo sólarhringa og í gær mældust 340 skjálftar nærri kvikuganginum. Frá miðnætti í dag hafa mælst um 150 skjálftar. Eru flestir skjálftarnir mjög smáir eða um 1,0 að stærð.
Dregið hefur úr hraða landriss við Svartsengi en hraðinn er þó enn allt að 1 cm á sólarhring. Í tilkynningunni segir:
„Aflögunargögn og niðurstöður líkanreikninga benda til að megnið af aflöguninni komi til vegna innflæðis undir Svartsengi frekar en innflæðis í kvikuganginn. Með öðrum orðum, þenslan við Svartsengi yfirgnæfir nú merkin við kvikuganginn en hægt dregur þó úr öllum færslum. Innflæði í kvikuganginn einskorðast við svæðið austan við Sýlingarfell. Þótt áfram dragi úr aflögun og skjálftavirkni, eru ennþá taldar líkur á eldgosi og ef til þess kemur er líklegasti staðurinn austan Sýlingarfells.“
