Fjölmiðlar víða um heim greina nú í morgunsárið frá því að samkomulag hafi náðst um tímabundið vopnahlé í stríðsátökunum milli Ísrael og Hamas-samtakanna.
Í fréttum BBC kemur fram að innan sólarhrings verði tilkynnt formlega um fjögurra daga vopnahlé. Á meðan á því stendur mun Hamas láta 50 gísla lausa og á sama tíma mun Ísrael láta 150 palestínskar konur og táninga lausa úr haldi.
Vopnahléið verður framlengt um einn dag fyrir hverja 10 gísla sem verður sleppt til viðbótar við þessa 50.
Ísrael mun láta annan 150 manna hóp palestínumanna, sem er í haldi, lausan ef 50 gíslar, á Gazasvæðinu, til viðbótar verða látnir lausir.
Ísraelsk stjórnvöld hafa birt lista yfir alls 300 Palestínumenn sem eru í haldi og gætu verið látnir lausir á grunni samkomulagsins. Flestir á listanum eru karlkyns og á táningsaldri. Listinn er birtur opinberlega af lagalegum ástæðum.
Áður en vopnahléið tekur gildi mun ísraelski herinn áfram gera árásir á Gaza en hefur tilkynnt að fram til klukkan fjögur í dag, að staðartíma, verði gert hlé á árásum á norðurhluta svæðisins svo almennir borgarar þar geti flúið til suðurs.
BBC ræðir við frænda konu sem tekin var í gíslingu Hamas ásamt tveimur börnum sínum. Hann segir fjölskylduna ekki hafa hugmynd um hvort þau séu á lífi og ef svo er sé algjör óvissa um líkamlega og andlega heilsu þeirra. Maðurinn segist ekki treysta Hamas til að standa við samkomulagið og ef frænka hans og börnin verði ekki í fyrsta 50 manna hópnum sem verði sleppt muni taka við enn lengri bið eftir því hvort þau verði mögulega í þeim 10 manna hópum sem verður hugsanlega sleppt í framhaldinu.
