Í miðborginni var tilkynnt um einstakling sem væri búinn að sofa í anddyri hótels í nokkra daga. Lögregla ræddi við manninn sem sagðist ekki eiga í nein hús að venda.
Hann sagðist hafa komið til Íslands nokkrum dögum áður þar sem hann ætlaði að gista hjá vini sínum sem síðan svaraði honum ekki í síma. Manninum var boðið að gista í fangaklefa sem hann þáði.
Lögregla, ásamt sérsveit ríkislögreglustjóra, var kölluð út eftir að tilkynnt var um hóp manna vera að veitast að einum manni. Einn af árásarmönnunum var sagður hafa haldið hníf upp að fórnarlambinu. Málið reyndist vera minniháttar rifrildi þegar lögregla kom á vettvang og voru nokkrir úr hópi árásaraðila farnir ásamt þeim sem sagður var hafa verið með hníf. Mennirnir fundust ekki.
Lögregla handsamaði svo ökumann sem reyndi að hlaupa úr bifreið sinni þegar lögregla stöðvaði för hann við umferðareftirlit. Var hann handtekinn fyrir að fara ekki að fyrirmælum lögreglu um að stöðva. Ökumaðurinn játaði neyslu fíkniefna og sagðist ekki vilja missa ökuréttindi sín. Ökumaðurinn færður á lögreglustöð þar sem hann var látinn laus að blóðsýnatöku lokinni.
Þessu til viðbótar aðstoðaði lögregla borgarana við að vísa óvelkomnum aðilum í burtu, dyraverðir voru aðstoðaðir á menntaskólaböllum vegna ölvaðra ungmenna og ölvaðir einstaklingar aðstoðaðir sem ekki gátu komið sér heim sjálfir.
