Maður hefur verið dæmdur í 45 daga skilorðsbundið fangelsi í kjölfar þess að hann missti stjórn á sér í nágrannaerjum. Dómurinn var kveðinn upp í Héraðsdómi Reykjaness í dag, 3. nóvember.

Málsatvik eru þau að þann 15. nóvember árið 2021 hringdi kona skelfingu lostin í lögreglu og tilkynnti að nágranni hennar hefði ráðist á eiginmann hennar og hótað honum með hnífi. Í texta dómsins segir jafnframt um málsatvikin:

„Samkvæmt frumskýrslunni kom fram í viðræðum við brotaþola á vettvangi að rafmagn hefði farið af íbúð hans, hann því farið og knúið dyra á heimili ákærða og beðið um aðgang að sameiginlegri rafmagnstöflu. Í stað þess að verða við beiðni brotaþola hafi ákærði snöggreiðst, sakað brotaþola um að „hakka“ sig inn á Facebook aðgang ákærða og til þess notað Samsung farsíma sinn, ákærði við svo búið rifið í hálsmál brotaþola, dregið fram hníf og bæði hótað og reynt að stinga brotaþola með hnífnum. Brotaþoli hafi svo náð að losa sig undan ákærða og farið upp í íbúð sína.“

Síðan segir að eftir þetta hafi ákærði skorið á dekk bíls nágrannanna.

Í ákæru var hinn ákærði sakaður um að hafa gripið fast og togað í hettu á úlpu nágrannans og sveiflað hnífi í áttina að honum þannig að hnífurinn lenti í úlpu hans þegar hann sneri sér undan og smeygði sér úr úlpunni. Við þetta hafi komið gat á úlpuna og maðurinn hlotið af þessu eymsli og stífleika í hálsi og baki.

Ennfremur var hinn ákærði sakaður um eignaspjöll með því að hafa traðkað á snjallsíma nágrannans og stungið með hnífi í dekkin undir bílnum hans.

Hinn ákærði játaði að hafa skorið í dekkin en þverneitaði fyrir að hafa eyðilagt síma nágrannans og ráðist á hann með hnífi. Dómari taldi hins vegar hafið yfir skynsamlegan vafa að hann væri sekur um öll ákæruatriðin.

Auk 45 daga skilorðsbundins fangelsis var hann dæmdur til að greiða nágrönnum sínum 300 þúsund krónur í skaðabætur og 200 þúsund í málskostnað. Einnig var hann dæmdur til að greiða tæpa hálfa milljón í annan sakarkostnað, aðallega málsvarnarlaun verjanda síns.