Stúdendaráð krefst þess að Háskóli Íslands endurgreiði hverjum þeim sem hefur greitt ólögmæt skráningargjöld við skólann. Þetta kemur fram í ályktun frá ráðinu.
Áfrýjunarnefnd kærumála háskólenema hefur gert HÍ skylt að endurgreiða nemanda skráningargjald sem hann greiddi til skólans vegna skólaársins 2021-2022. (Sjá mbl.is).
Nemandinn kærði skráningargjaldið til háskólaráðs sem hafnaði beiðni hans en áfrýunarnefndin hefur fellt þann úrskurð úr gildi. Nefndin telur grundvöll fyrir innheimtu skráningargjaldsins vera ófullnægjandi.
Jón Atli Benediktsson, háskólarektor, hefur sent tilkynningu til fjölmiðla þar sem hann vill leiðrétta meintan misskilning þess efnis að skráningargjaldið í heild sé ólögmætt. Jón Atli segir:
„Líkt og fram hefur komið í fjölmiðlum hefur áfrýjunarnefnd í kærumálum háskólanema komist að niðurstöðu í máli sem snýr að innheimtu skrásetningargjalda.
Af umfjöllun fjölmiðla um málið má ráða að nokkurs misskilnings gæti um niðurstöðu nefndarinnar. Jafnvel hefur komið fram að nefndin hafi kveðið á um að enginn grundvöllur væri fyrir innheimtu skrásetningargjalds en slíkt er alls ekki rétt.
Í niðurstöðu nefndarinnar kemur einfaldlega fram að útreikningar vissra kostnaðarliða sem felldir hafa verið undir gjaldið séu ekki fullnægjandi.
Eftir að niðurstaðan lá fyrir hófst vinna hér innan Háskólans við að sjá til þess að útreikningar fyrir umrædda kostnaðarliði séu eins og vera ber.
Ég mun tryggja að háskólaráð og fulltrúar stúdenta verði upplýstir um framvindu málsins.“
Í tilkynningu stúdentaráðs um málið segir:
„Stúdentaráð Háskóla Íslands lítur úrskurð áfrýjunarnefndar í kærumálum háskólanema, um ólögmæti skrásetningargjalda, alvarlegum augum.
Vanfjármögnun opinberra háskóla á Íslandi veldur því að Háskóli Íslands hefur gripið til þess ráðs að seilast í vasa stúdenta til þess að halda sér á floti.
Því krefjumst við þess að Háskóli Íslands endurgreiði hverjum þeim sem greitt hefur ólögmæt skrásetningargjöld við skólann, eins og honum ber skylda til.“
