dk hugbúnaður styður konur og kvár í kvennaverkfallinu sem fram fer 24. október næstkomandi. Þær konur sem starfa hjá fyrirtækinu og taka þátt í verkfallinu verða ekki fyrir tekjutapi. dk er með yfir 7000 viðskiptavini og er einn stærsti hýsingaraðilinn á landinu með yfir 30 þúsund einstök fyrirtæki í hýsingu.,,Það er ljóst að þetta mun hafa mikil áhrif á þjónustu og starfsemi okkar þennan dag. Við verðum með opið en með skerta þjónustu. Verkfallið er mikilvæg áminning til samfélagsins um mikilvægi þess að meta fólk að jöfnu óháð kyni. Baráttudagurinn 24. október er hvatning til samfélagsins að gera enn betur og stuðla að auknu jafnrétti. Hjá dk starfar öflugur hópur fólks með mikla reynslu, góða menntun og sérhæfingu. Fyrirtækið státar sig af því að hafa eitt hæsta hlutfall kvenna hjá fyrirtækjum í upplýsingatækni sem og fjölda kvenna í stjórnunarstöðum innan fyrirtækisins. Hlutfall kvenna í dk er yfir 40%, meirihluti í framkvæmdastjórn eru konur og fyrirtækið fékk í síðustu viku viðurkenningu Jafnvægisvogarinnar annað árið í röð. Við tökum skýra afstöðu í baráttunni og hvetjum aðra til að gera slíkt hið sama,“ segir Hulda Guðmundsdóttir, framkvæmdastjóri dk hugbúnaðar.
