Hann benti á að nú þegar stríð geisar í Evrópu, við landamæri NATO, sé mikil hætta á að einhver misreikni sig eða geri mistök sem geti leitt til þess að stríðið stigmagnist á hættulegan hátt.
Í nóvember lenti flugskeyti á pólsku landsvæði, við þorpið Przewodow, nærri úkraínsku landamærunum og varð tveimur að bana.
Fyrr í september sögðu úkraínsk yfirvöld að rússneskur dróni hefði sprungið yfir rúmensku landi en því neituðu rúmensk yfirvöld á þeim tíma. Síðar kom í ljós að rússneskur dróni hafði í raun brotlent í Rúmeníu sem er aðildarríki NATO.
Bell benti á að báðir þessir atburðir hefðu hugsanlega getað kallað á viðbrögð NATO.
Því næst benti hann á að hernaðarmáttur Rússa hafi beðið mikinn hnekk eftir ólöglega innrás þeirra í Úkraínu. Þeir hafi misst rúmlega 2.000 skriðdreka, séu háðir Írönum um dróna og verði að semja við Norður-Kóreu til að fá fallbyssuskot. Það sé því ljóst að eitt það síðasta sem Rússar vilja nú sé að lenda í beinum útistöðum við NATO.
Einnig sé rétt að benda á að þrátt fyrir að brak úr rússneskum flugskeytum hrapi til jarðar á landsvæði NATO, þýði það ekki að Rússar hafi meðvitað miðað á NATO, ef þeir ætluðu að gera það myndu þeir velja mikilvægari skotmörk. En Rússar eigi á hættu að mistök eigi sér stað þegar þeir gera árásir svo nærri landsvæði NATO.
„Hins vegar, ef Rússar væru nægilega heimskir til að skjóta á mikilvæg skotmörk hjá NATO, myndi það kalla á mjög hörð viðbrögð og öflugt hernaðarlegt svar,“ sagði hann að lokum.
