Flugfélaginu Neos var heimilt að neita konu um far frá Keflavík til Faro í Portúgal í fyrrasumar. Það var gert á grundvelli öryggissjónarmiða þar sem konan var ölvuð og dónaleg við starfsfólk.

Konan leitaði til Samgöngustofu vegna málsins en í úrskurði hennar var kröfu konunnar um endurgreiðslu kostnaðar og skaðabætur úr hendi Neos hafnað.

Konan hugðist fljúga í sólina til Portúgals þann 7. júní 2022 en var snúið frá þegar komið var að hliðinu á Keflavíkurflugvelli.

Í svari Neos til Samgöngustofu kemur fram að starfsmaður félagsins hafi tekið eftir því við innritunarborðið að konan væri ölvuð og þá hefði hún sýnt starfsfólki dónaskap. Þegar komið var að hliðinu hafi konan verið enn ölvaðri en áður. Málið hafi verið rætt við flugstjóra vélarinnar sem hafi ákveðið að hleypa konunni ekki um borð.

Álitaefnið í málinu sneri að því hvort neitun Neos um far hafi verið réttmæt. Í niðurstöðu Samgöngustofu er bent á að flugstjóri hafi, lögum samkvæmt, æðsta vald í loftfari og honum sé heimilt, þegar nauðsyn ber til, að vísa burt farþegum.

„Það er ljóst af gögnum málsins að kvartanda var neitað um far með flugi Neos nr. NO2904 þann 7. júní 2022 þar sem að starfsmenn á vegum félagsins sem voru að innrita farþega og flugstjóri í viðkomandi flugi töldu að kvartandi væri til þess fallinn að valda ónæði um borð í flugvélinni og jafnvel stefna öryggi flugsins í hættu,“ segir í niðurstöðunni.

Að mati Samgöngustofu þótti ekki tilefni til að draga í efa þá ákvörðun flugstjóra að neitunin hafi verið tekin í því skyni að tryggja öryggi loftfarsins.