Mörg fyrirtæki í veitingageiranum eiga í rekstrarerfiðleikum um þessar mundir og sum þeirra munu leggja upp laupana. Erfiðu rekstrarumhverfi og breyttu neyslumynstri er um að kenna.

Þetta segir Bragi Skaftason, sem er með rúmlega 20 ára reynslu af rekstri veitingastaða. Fréttablaðið skýrir frá þessu í dag. Haft er eftir Braga að það séu sviptingar fram undan og að veitingastöðum muni fækka. Það sé alveg ljóst.

Hann sagði greinina standa frammi fyrir innistæðulausum verð- og launahækkunum. „Auðvitað á starfsfólk veitingastaða skilið að fá góð laun en staðreyndin er samt sú að veitingahús á Íslandi greiða að jafnaði yfir 50 prósent af sinni innkomu í laun. Sem er langt yfir því sem heilbrigður rekstur í þessu umhverfi þolir,“ sagði hann.

Hann sagði að ofan á þetta bætist að veitingastaðir greiði oftast mun hærri húsaleigu en gengur og gerist í öðrum atvinnugreinum á sama svæði.

Neyslumynstur hefur einnig breyst með tilkomu mathalla og meiri sjálfvirkni á veitingahúsum. „Mögulega eru veitingastaðir í Reykjavík bara orðnir  of margir,“ sagði Bragi.

Hægt er að lesa nánar um málið í Fréttablaðinu í dag.