Á sjötta tímanum í gær var óskað eftir aðstoð lögreglu við að vísa fólki út úr stigagangi húss í Miðborginni en þangað hafði það farið inn í þeim tilgangi einum að neyta fíkniefna.

Tilkynnt var um ökumann sem svaf fram á stýri bifreiðar. Þegar lögreglan ræddi við hann sagðist hann vera uppgefinn eftir próflestur síðustu daga og verið að leggja sig áður en hann færi að versla í matinn.

Húsleit var gerð á heimili í Miðborginni. Húsráðandinn var kærður fyrir vörslu á kökum sem talið er að innihaldi kannabisefni.

Tveir ökumenn voru handteknir grunaðir um að vera undir áhrifum áfengis og/eða fíkniefna.

Tveir voru handteknir á áttunda tímanum í gærkvöldi grunaðir um akstur undir áhrifum áfengis og fíkniefna. Þeir eru einnig grunaðir um að hafa unnið skemmdarverk á bifreið. Báðir voru þeir vistaðir í fangageymslu.