Flug Wizz Air frá Budapest til Keflavíkur í gær tafðist um tæpar tvær klukkustundir vegna framkomu farþega um borð sem þurfti að yfirbuga. DV ræddi við konu sem var að bíða eftir flugi með sömu vél frá Keflavík til Budapest og fékk konan þessar upplýsingar hjá starfsmanni á innritunarborði.
Starfsmaðurinn tjáði konunni að vélin hefði þurft að millilenda í Stokkhólmi í Svíþjóð vegna framkomu eins farþega. Af þessum sökum tafðist flugið frá Keflavíkur til Budapest.
DV hafði samband við Guðjón Helgason, upplýsingafulltrúa hjá Isavia. Guðjón hafði ekki upplýsingar um málið og sagði auk þess að Isavia myndi ekki tjá sig um slík mál er varða erlend flugfélög. Hann gat hins vegar staðfest að vél Wizz Air frá Budapest í gær hefði átt að lenda kl. 16:20 en hefði lent kl. 18:11 og því hefði orðið óskýrð töf upp á tæpar tvær klukkustundir.
Ekki liggja fyrir nánari upplýsingar um atvikið.
