Bandaríkin og Vesturlönd eiga að hætta að veðja á stríðið í Úkraínu endi með jafntefli, þ.e.a.s. að hvorugur stríðsaðilinn sigri, og segja skýrt að meginmarkmiðið sé að Úkraína beri sigur úr býtum og hreki rússneska innrásarliðið á brott frá hernumdu svæðunum.

Þetta sagði Jacob Kaarsbo, sérfræðingur hjá dönsku hugveitunni Tænketanken Europa og fyrrum aðalgreinandi hjá leyniþjónustu danska hersins, í samtali við TV2. Hann sagði að Bandaríkin og Vesturlönd verði að vinna hraðar og láta úkraínska hernum þau vopn í té sem hann hefur þörf fyrir. „Það er þörf á að Bandaríkin breyti markmiði sínu og sendi skýrt merki um að Vesturlönd muni gera það sem þarf til að Úkraína sigri í stríðinu. Það hefur til dæmis tekið allt of langan tíma að afhenda ATACMS-flugskeytin, sem eru svo mikilvæg fyrir gagnsókn Úkraínumanna,“ sagði Kaarsbo.

Ben Hodges, fyrrum yfirmaður bandaríska heraflans í Evrópu og fyrrum yfirmaður herja NATO í Evrópu, sagði nýlega í samtali við Berlingske að það sé þörf á skýrri stefnu Vesturlanda um að Úkraína eigi að sigra í stríðinu.

Hann sagðist taka vel eftir því sem Joe Biden, Bandaríkjaforseti, segir ekki þegar hann ræðir um stuðninginn við Úkraínu. „Mér finnst stærsta vandamálið vera að ríkisstjórnin hefur ekki fram að þessu sagt að Úkraína eigi að vinna stríðið. Hún hefur ekki sagt skýrt að markmiðið sé að Úkraína endurheimti landsvæði sitt samkvæmt alþjóðlega viðurkenndum landamærum frá 1991. Þeir segja nánar tiltekið að Úkraína megi ekki tapa,“ sagði hann.