Þann 28. janúar á þessu ári var maður handtekinn á Keflavíkurflugvelli, á leiðinni út úr landi, eftir að hafa dvalist eina nótt á landinu. Hafði maðurinn komið hingað til lands frá Mílanó daginn áður. Tollverðir höfðu afskipti af manninum og uppgötvuðu að hann var með rúmlega 5.000 evrur í vösum sínum, eða sem nemur um 730 þúsund íslenskum krónum.
Maðurinn var handtekinn vegna gruns um peningaþvætti og lagt var hald á peningana og farsíma mannsins.
Maðurinn krafðist þess að haldlagningunni yrði aflétt og þann 14. september hafnaði Héraðsdómur Reykjaness þeirri kröfu.
Landsréttur sneri hins vegar úrskurðinum við þann 19. september og úrskurðaði að maðurinn skyldi fá peningana til baka. Í ákvörðun Landsréttar vegur þungt að lögregla virðist fátt hafa gert í rannsókn málsins allt frá því maðurinn var handtekinn og hald lagt á peningana. „Af gögnum málsins verður ekki ráðið að sóknaraðili hafi aðhafst frekar í málinu og eru ástæður þess óútskýrðar,“ segir í úrskurðinum. Ennfremur segir:
„Samkvæmt 1. mgr. 70. gr. stjórnarskrárinnar ber öllum réttur til að fá úrlausn um ákæru á hendur sér um refsiverða háttsemi með réttlátri málsmeðferð innan hæfilegs tíma fyrir óháðum og óhlutdrægum dómstóli, sbr. einnig 1. mgr. 6. gr. mannréttindasáttmála Evrópu. Þá er í 2. mgr. 53. gr. laga nr. 88/2008 kveðið á um skyldu þess sem rannsakar sakamál að hraða málsmeðferð eftir því sem kostur er.
Með vísan til framangreinds verður að telja að slíkur dráttur hafi orðið á rannsókn málsins að fari í bága við fyrrgreind ákvæði en það getur eitt og sér leitt til þess að
aflétta beri haldi, sbr. til hliðsjónar dóm Hæstaréttar 8. júní 2016 í máli nr. 426/2016 og úrskurð Landsréttar 22. mars 2019 í máli nr. 204/2019. Verður því fallist á kröfuvarnaraðila eins og nánar greinir í úrskurðarorði.“
Er það niðurstaða Landsréttar að haldlagningu lögreglu á peningum mannsins skuli aflétt.
