Fimm ára drengur er látinn eftir að honum var bjargað, síðastliðinn þriðjudag, úr sjónum við bæinn Norheimsund í Noregi sem er um það bil 45 kílómetra austan við Bergen.
Drengurinn var nær dauða en lífi þegar honum var bjargað úr sjónum og flogið með þyrlu á sjúkrahús. Hópur barna var að synda í sjónum þegar slysið varð. Lögreglan hefur ekki upplýsingar um hversu lengi drengurinn var undir yfirborðinu.
Tilkynning um slysið barst klukkan 14:42 að staðartíma en viðbragðsaðilar hófu lífgunartilraunir klukkan 14:56. Lögreglan hefur ekki upplýsingar um atburðarásina áður en tilkynningin barst og hvort að drengurinn hafi verið fastur undir yfirborðinu áður en henni var tilkynnt um slysið. Atvikið er til rannsóknar.
Geðteymi mun verða fjölskyldu drengsins til aðstoðar en stöðvarstjóri lögreglunnar á svæðinu segir fjölskylduna vera í djúpri sorg.
Norheimsund er hluti af sveitarfélaginu Kvam. Starfandi bæjarstjóri segir slysið snerta alla íbúa sveitarfélagsins og það hafi því miður haft verstu mögulegu afleiðingar.
Það var NRK sem greindi frá.
