Lögmaðurinn sem kærður var fyrir nauðgun og önnur brot gegn eiginkonu skjólstæðings síns segist hafa verið krafinn um allt að 25 milljónir króna af parinu gegn því að aldrei yrði kært í málinu. Hann hefur tilkynnt málið til lögreglu en þetta fram í frétt RÚV um málið.

Eins og DV greindi frá í gær óskaði  lögmaðurinn eftir því að málið yrði rannsakað sem fjárkúgun. Hann hafi verið vinur hjónanna um árabil og verið lögmaður þeirra í nokkrum málum. Hann gengst við því að hafa hafið kynferðissamband við konuna en um svipað leyti var eiginmaðurinn í gæsluvarðhaldi vegna gruns um fíkniefnasmygl. Meint brot lögmannsins hafi meðal annars átt sér stað meðan skjólstæðingurinn var í einangrun á Hólmsheiði og þegar konan var vistuð á bráðageðdeild. Þá er hann sakaður um að hafa blekkt manninn til þess að fá greiðari aðgang að eiginkonunni.

Í umfjöllun RÚV kemur fram að lögmaðurinn fullyrðir að parið  hafi krafist þess í janúar síðastliðnum að hann greiddi þeim tíu milljónir, að öðrum kosti myndu þau kæra hann. Hann hafi neitað því en þá hafi þau reynt að ná til hans í gegnum annað fólk. Þegar það hafi ekki gengið eftir hafi þau hækkað kröfuna í 25 milljónir. Lögmaðurinn tilkynnti þetta til lögreglu í apríl sem tilraun til fjárkúgunar og segir að málið sé nú til rannsóknar.

Þá kemur fram að lögmaðurinn sagðist ekki hafa farið með málið fyrr til lögreglu vegna þess að hann vonaðist eftir því að hægt yrði að leysa það í góðu.

Hann gengst ennfremur við því að hegðun hans samræmist ekki faglegum gildum lögfræðinga en segist ekki kannast við að komið hafi fram fleiri athugasemdir við störf hans eins og fullyrt hefur verið í fréttum.