Í gærkvöld fékk lögregla símtal um að ekið hefði verið á hús í Kópavogi. Við höggið hringdi bíllinn í 112. Samkvæmt upplýsingum úr dagbók lögreglu varð lítið eignatjón við áreksturinn.

Í nótt var tilkynnt um mann sem var að sveifla hnífi í miðborginni. Hann var handtekinn, grunaður um vopnalagabrot og vistaður í fangageymslu í þágu rannsóknar málsins.

Tilkynnt var til lögreglu í gærkvöld að maður neitaði að borga fyrir sig á veitingastað í miðborginni. Hafði hann sjálfur krafist þess að hringt yrði á lögreglu. Maðurinn var fluttur á lögreglustöð og honum tilkynnt að hann yrði kærður fyrir fjársvik. Að því loknu var hann látinn laus.

Í Breiðholti var tilkynnt um ungmenni sem voru að kveikja eld inni á almenningssalerni. Voru þau farin þegar lögreglu bar að.

Tilkynnt var um veiðiþjófnað í Elliðaánum. Er lögreglumenn komu á vettvang hittu þeir einn mann, honum kynnt að það mætti ekki veiða í ánni en hann var ekki með neinn afla og því laus allra mála.

Tilkynnt var um bíl uppi á grjóti í Hafnarfirði eða Garðabæ. Haft var samband við skráðan eiganda sem kvaðst ætla að gera viðeigandi ráðstafanir varðandi bílinn.

Óskað var aðstoðar lögreglu er ökumaður hafði fest bíl sinn í Mosfellsbæ. Bíllinn var losaður með dráttarbíl og honum ekið af vettvangi, ekkert eignartjón varð né slys á fólki.