Sólveig Anna Jónsdóttir formaður Eflingar sver af sér aðkomu Ragnar Þórs Ingólfsssonar formanns VR að „kven-demonískum ákvarðanatökum mínum eða fyrirætlunum sem kven-formanni í verkalýðshreyfingunni. Þar ber ég alla sök og hann enga,“ segir Sólveig sem segist vera kvenréttindakona frá blautu barnsbeini og ávallt verið meðvituð um sitt eigið „agency.“

Segir Sólveig að í kosningabaráttunni sem nú stendur yfir í VR hafi það þótt smart hjá vissri kreðsu að gera formann VR samsekan henni í margvíslegri glæpastarfsemi hennar eða kenna Ragnari Þóri um hvað hún sé vond. 

„Þessi kreðsa er samt að eigin sögn gríðarlega femínísk. Þetta finnst mér voðalega ruglandi því síðast þegar að ég vissi þá er mjög mikilvægt í femínískum fræðum að boða „agency“ (verkun) sem þátt í valdeflingu kvenna; getu kvenna til að grípa til markvissra aðgerða og stefna sjálfstætt að markmiðum, algjörlega óháð því hvað mönnum finnst, hvað þeir vilja eða hvaða skoðanir þeir hafa.“

Sólveig segist mál að linni. Segist hún tilbúin í margt en ekki það að ábyrgðinni á henni sé klínt á menn út í bæ

„Ég er tilbúin til að játa samneyti við ketti og kölska, og geitur, bæði frekju og venjulegar, mörg síðustu ár. Og ef að þau vilja axla ábyrgð á hegðun minni og framkomu þá mun ég ekki gera neinar sérstakar athugasemdir við það. En sem kvenréttindakona bókstaflega krefst ég þess að hætt verði að reyna að klína ábyrgðinni á mér á menn útí bæ. Í nafni móðurgyðjunnar, hingað og ekki lengra: Ég hef engan áhuga á að deila kven-bálkestinum mínum með blásaklausum karli.“