Sara Dögg Svanhildardóttir, oddviti Viðreisnar í Garðabæ, skýtur föstu skoti á Garðbæinga í pistli sínum á Visir.is. Segir hún skugga falla á niðurstöður nýrrar ánægjukönnunar þar sem Garðabær mælist hæst allra sveitarfélaga í ánægju með búsetu með einkunnina 4.3 af 5 mögulegum.

„Skugga sem tekur frá okkur í Viðreisn þá miklu gleði og stolt sem að alla jafna ætti að fylgja niðurstöðu sem þessari.“

Sara Dögg segir ánægju með þjónustu við fatlað fólk mælast 3.3 af 5 mögulegum og standa í stað milli ára.

„Enn eitt árið gengur ekkert né rekur að hífa upp ánægjuna. Á sama tíma og allir aðrir þjónustuþættir hækka á milli ára. Allir nema einn. Þjónusta við fatlað fólk. Þrátt fyrir endurtekna möntru meirihlutans ár eftir ár um að þjónusta við fatlað fólk sé mjög góð. Allt sé gert til þess að mæta þjónustuþörf fatlaðs fólks,“ segir Sara Dögg og spyr hvernig standi á þessu.

„Hér fer einfaldlega ekki saman hljóð og mynd. Getur verið að mat meirihlutans á því hvað sé mjög góð þjónusta rými alls ekki við þá þjónustuþörf sem fatlað fólk á rétt á og hefur þörf fyrir? Getur verið að hér sé um einhvers konar ofmat að ræða?“

Hefur alla burði til að gera betur

Sara Dögg segir Garðabæ hafa alla burði til að gera betur og staðan eins og hún er sé einfaldlega ekki boðleg í sveitarfélagi þar sem hægt er að gera eins vel og niðurstöður könnunar sýnir í öllum öðrum þjónustuþáttum. Segir hún Viðreisn hafa nýlega lagt fram

tillögu um að framkvæmd frumkvæðisskyldu sveitarfélagsins gagnvart fötluðu fólki yrði rýnd og tekin út. Tillaga sem kemur sér afar vel í ljósi þessarar niðurstöðu að sögn Söru Daggar.

„Garðabær hefur alla burði til þess að gera betur. Hér þarf einfaldlega kjark og vilja til. Sveitarfélagið stendur vel fjárhagslega og er því til háborinnar skammar að hér takist ekki betur til. Við í Viðreisn höfum ítrekað bent á þessa skökku stöðu. Skekkjuna þurfum við að finna og laga. Í Garðabæ viljum við að allir íbúar séu ánægðir. Fatlaðir jafnt sem ófatlaðir.“