Klukkan 01.28 var hringt í lögregluna og tilkynnt um hugsanlegt innbrot í verslun í Miðborginni. Þegar lögreglan kom á vettvang lá strax ljóst fyrir að ekkert var hæft í tilkynningunni. Tilkynnandinn var í bifreið fyrir utan verslunina og var hann handtekinn, grunaður um akstur undir áhrifum fíkniefna.

Um klukkan 22 voru tveir handteknir, grunaðir um sölu og dreifingu fíkniefna/lyfja. Þeir voru með talsvert magn lyfseðilsskyldra lyfja í fórum sínum auk meintra fíkniefna. Annar þeirra er einnig grunaður um akstur undir áhrifum vímuefna. Annar reyndist vera eftirlýstur vegna rannsóknar annars máls. Báðir voru þeir vistaðir í fangageymslu.

Á tíunda tímanum var einn handtekinn þegar hann var að kaupa sér fíkniefni. Við nánari skoðun reyndist hann vera með meira magn fíkniefna á sér en þau hafði hann keypt skömmu áður.

Um klukkan 4 var einn handtekinn í Miðborginni, grunaður um innbrot í verslun. Hann var með vopn á sér.

Einn var handtekinn á áttunda tímanum í gærkvöldi, grunaður um líkamsárás og frelsissviptingu. Hann var vistaður í fangageymslu.

Fjórir ökumenn voru handteknir í gærkvöldi og nótt, grunaðir um að vera undir áhrifum áfengis og/eða fíkniefna.