Íslenska konan sem var stungin af fyrrverandi eiginmanni sínum fyrir utan McDonalds skyndibitastað um hábjartan dag þann 19. janúar er komin til meðvitundar. RÚV greinir frá.
Lögreglan hefur náð að ræða við hana en ekki hefur verið tekin af henni formleg skýrsla.
Konunni var haldið sofandi á sjúkrahúsi eftir að hún særðist alvarlega í árásinni sem átti sér stað í bænum Karmøy og hefur hún þurft að gangast undir nokkrar aðgerðir.
RÚV greinir frá því að samkvæmt upplýsingum frá saksóknara hefur maðurinn, sem einnig er íslenskur, verið yfirheyrður nokkrum sinnum frá þvía ð hann var handtekinn eftir árásina. Lögregla hefur yfirheyrt fjölda vitna og unnið að tæknilegum hluta rannsóknar.
Telur lögregla sig hafa góða mynd af atburðarásinni en rannsókn er þó ekki lokið.
Konan og maðurinn eru bæði á sjötugsaldri og voru gift í um 40 ár og eiga saman uppkomin börn. Þau hafa búið lengi í Noregi og eru bæði með norskan ríkisborgararétt.
Konan hafði í haust fengið nálgunarbann gegn manninum eftir að hann reyndi að brenna hana inni. Maðurinn braut þó ítrekað gegn nálgunarbanni og var yfirheyrður vegna brots gegn nálgunarbanni um 40 mínútum áður en árásin átti sér stað.
Miðillinn Radio Haugaland vitnar til nágranna fólksins að maðurinn hafi lengi beitt konuna og börn sín ofbeldi og hafi lögreglan verið fullmeðvituð um stöðuna. Furðuðu nágrannar sig á því að ekki hafi meira verið gert til að tryggja öryggi konunnar.
