Þegar lögreglumenn hjá lögreglunni á höfuðborgarsvæðinu gáfu ökumanni einum merki um að stöðva aksturinn skömmu eftir miðnætti sinnti hann þeim ekki og jók hraðann. Á ofsahraða reyndi hann að komast undan lögreglunni. Þetta endaði með að bifreið hans endaði utan vegar og litlu mátti muna að hún endaði inni í garði. Ökumaðurinn tók þá til fótanna en var hlaupinn uppi af fótfráum lögreglumönnum. Hann reyndist vera eftirlýstur vegna annarra mála og auk þess er hann grunaður um að hafa verið undir áhrifum fíkniefna. Hann var vistaður í fangaklefa.

Um klukkan hálf eitt réðst farþegi á leigubílstjóra og beitti hann ofbeldi. Hann olli einnig skemmdum á leigubifreiðinni. Farþeginn var handtekinn og vistaður í fangageymslu.

Einn var handtekinn vegna líkamsárásar á tólfta tímanum í gærkvöldi. Hann var vistaður í fangageymslu.

Fjórir ökumenn voru handteknir í gærkvöldi og nótt. Allir eru þeir grunaðir um að hafa verið undir áhrifum áfengis. Einn þeirra svaf undir stýri bifreiðar sinnar á gatnamótum þegar lögreglan hafði afskipti af honum.

Á níunda tímanum missti ökumaður stjórn á bifreið sinni og ók á vegrið. Bifreiðin var óökufær á eftir en engin slys urðu á fólki.

Á tólfta tímanum ók ökumaður út af veginum í Heiðmörk. Hann kenndi sér meins en afþakkaði aðstoð sjúkraflutningamanna.