Það framtak Ríkisútvarpsins að miðla efni frá fréttastofu á samfélagsmiðlinum Tiktok hefur gefist vel. RÚV hóf innreið sína á miðilinn í byrjun október og er markmiðið að birta örskýringar um ýmis fréttamál, ekki síst fyrir yngri kynslóðina sem að sækir flestar sínar frétt og upplýsingar í gegnum samfélagsmiðla.
Á föstudögum er þó stundum birt léttara efni, iðulega eitthvað sem gerist bak við tjöldin á hinni líflegu fréttastofu. Eins og gefur að skilja er slíkt skemmtiefni oft vinsælla en fréttaefnið en eitt myndband hefur gjörsamlega slegið í gegn og það á heimvísu.
Umrætt myndband er af Maríu Sigrúnu Hilmarsdóttur, fréttakonu og þulu á fréttastofu RÚV þar sem hún er að gíra sig upp í beina útsendingu með óvenjulegum hætti. Rapplagið „It Was a Good Day“ með fjöllistamanninum IceCube ómar í stúdíóinu í Efstaleiti og María Sigrún tekur vel undir og er greinilega með allt á hreinu í rappfræðunum.
Myndabandið naut strax mikilla vinsælda á Tiktok en hefur verið að bæta verulega í undanfarna daga. Þannig voru áhorfin orðin um 2 milljónir í byrjun vikunnar en þegar þessi orð eru skrifuð hafa áhorfin rofið 2,5 milljóna múrinn. Þá er ekki öll sagan sögð því fjölmargir Tiktok-notendur hafa endurbirt myndbandið á sínum rásum og fengið milljónir áhorfa sömuleiðis.
Fréttakonan glæsilega nýtur að því er virðist sérstakra vinsælda í latínsku-Ameríku en sjá má fjölmargar athugasemdir við myndbandið frá því horni heimsins þar sem María Sigrún er dásömuð í bak og fyrir. Þá herma vafasamar heimildir Fókus að eitthvað sé um að smeðjuleg skilaboð frá latínskum vonbiðlum hafi borist RÚV og Maríu Sigrúnu persónulega.
Ólíklegt er þó að María Sigrún muni slaufa fréttaferlinum og gerast samfélagsmiðlastjarna en þó skal aldrei útiloka neitt!
