Fyrirtækið Thor’s Skyr hefur verið í miklum vexti í Bandaríkjunum undanfarið ár, en um er að ræða fyrirtæki sem þeir Hafþór Júlíus Björnsson, kraftlyftingamaður, og Unnar Helgi Daníelsson, veitingamaður, koma að. Með þeim í lið hafa slegist leikarinn Dylan Sprouse og leikarinn Terry Crews.
Terry Crews hefur ekki farið leynt með ást sína á jógúrti og skyri í gegnum tíðina og sagði hann þegar hann slóst í hóp Thor’s Skyr í desember að hann væri spenntur að fá að taka þátt í að kynna skyr fyrir Bandaríkjamönnum.
Ekki eru þó allir sáttir með hlut Terry Crews í þessari kynningu á skyrinu. Terry deildi jólakveðju frá fyrirtækinu, þar sem hann, Hafþór Júlíus, Unnar og Dylan Sprouse óska viðskiptavinum gleðilegra jóla, á Facebook-síður sinni og hafa þar Íslendingar látið til sín taka í athugasemdakerfinu og gagnrýna að Terry sé að tengja nafn sitt við Hafþór sem hafi verið sakaður um ofbeldi gegn konum.
Athugasemdirnar má rekja til færslu sem birtist í Facebook-hópi þeirra sem berjast gegn ofbeldismenningu, en þar var vakin athygli á samstarfi Terry Crews við Thor’s Skyr og fólk hvatt til að láta til sín taka í athugasemdum.
„Virkilega sorglegt að sjá þig, herra Crews, styðja við vöru sem er framleidd af þekktum flagara sem lemur konurnar sem hann er í sambandi við og að þú hafir taggað hann þar að auki,“ skrifar einn.
„Virkilega sorglegt að sjá þig styðja þennan durg,“ skrifar annar og deilir grein sem fjallar um ásakanir á hendur Hafþóri um heimilisofbeldi.
Hér eru svo dæmi um fleiri athugasemdir:
„Terry – þú ert goðsögn og frábær fyrirmynd. Hafþór (Fjallið úr Game of Thrones) hefur verið sakaður um alvarlegt ofbeldi af fyrrverandi mökum og hótar að lögsækja þá sem tala um það. Hann er ekki maður sem þú vilt láta tengja þig við, hann er algjör padda“
„Í alvörunni TC? Ég hélt þú værir á móti heimilisofbeldi“
„Ég myndi endurskoða samstarfið við Thor – hann er þekktur fyrir að beita konur ofbeldi“
„Sorglegt að sjá þig styðja og vinna með þessum manni. Ég held þú ættir að gera betur.“
„Ég man eftir að þú sagðir söguna um að standa loksins í lappirnar gegn föður þínum eftir að hann barði móður þína fyrir framan börnin þín. Hvernig geturðu stutt við mann sem gerir það sama?“
Ólöf Tara Harðardóttir í Öfgum skrifaði:
„Ekki selja gildi þín svona ódýrt Terry. Ef þú virkilega styðjur þolendur þá styður þú ekki við þennan mann. Lestu viðtalið sem er búið að deila hér ítrekað. Ef þú kýst að hunsa þetta ertu að taka afstöðu með meintum geranda.“
Umræddar ásakanir má rekja til ársins 2017. Þá greindi Fréttablaðið frá því að lögregla hafi verið ítrekað kölluð til að heimili Hafþórs vegna heimiliserja og hermdu heimildir að fyrrverandi kærasta bæri áverka eftir hann. Þrjár konur greindu svo frá því að hann hafi beitt þær ofbeldi á meðan þær átti í sambandi við hann og hafði ein þeirra kært hann til lögreglu.
Barnsmóðir hans steig í framhaldinu fram í viðtali og greindi frá samskiptum sínum við hann en hún sakaði hann um að hafa beitt sig ofbeldi.
Hafþór hefur neitað þessum ásökunum og íhugaði um tíma að leita réttar síns. Lögmaður hans sagði árið 2017 að Hafþór væri með öllu laus við ofbeldishneigð og beitti hvorki konur né karla ofbeldi. Það gæti orðið dýrt að veitast að Hafþóri með rógburði þar sem ímynd hans væri mjög verðmæt og mögulega væru konurnar sem sökuðu hann um ofbeldi í hefndarhug.
Sjá einnig: Hafþór Júlíus hótaði Tinnu – „Ég læt ekki þagga niður í mér“
