Konráð S. Guðjónsson, aðalhagfræðingur Stefnis, segir líklegt að fasteignaverð muni lækka á næstu misserum. Þetta kemur fram í umfjöllun Markaðarins í Fréttablaði dagsins.
„Ég held að það hljóti að koma einhver raunverðslækkun miðað við þær miklu breytingar sem hafa orðið, þótt hún verði ekki endilega mikil,“ er haft eftir Konráð. Tekur hann fram að erfitt sé að segja til um hvort nafnverðslækkanir muni eiga sér stað.
Á mannamáli þýðir það íbúð sem var að seljast á 50 milljónir mun kannski ekki lækka niður í 48 milljónir (sem væri nafnverðslækkun) heldur hækka hægar en verðbólga (sem væri þá raunverðslækkun þó fasteignin héldi áfram að hækka lítilega í verði).
„Eðli fasteignamarkaðarins er þannig að ef það er mikill þrýstingur á að nafnverð lækki þá hefur tilhneigingin verið sú að það birtist í minni veltu og það sé erfiðara að selja heldur en í nafnverðslækkun,“ segir Konráð ennfremur.
Bergþóra Baldursdóttir, hagfræðingur í greiningu Íslandsbanka, er á öðru máli en hún telur ósennilegast að framundan séu lækkanir á fasteignamarkaði, hvorki að raunvirði né nafnivirði. Segir hún líklegra að fasteignamarkaðurinn muni róast en síðan halda áfram að hækka í takti við annað verðlag.
Nánar er fjallað um málið í Markaði Fréttablaðsins.
