Dýralæknar hjá Matvælastofnun heimila að sýktur eldislax sé seldur á innanlandsmarkaði. Þar með virðast aðrar reglur gilda um sýktan eldislax en kjöt af riðuveiku sauðfé en því er öllu fargað.

Fréttablaðið skýrir frá þessu í dag. Segist blaðið hafa heimildir fyrir að sýktur lax, úr eldiskvíum í Berufirði og Reyðarfirði, hafi verið fluttur í svokölluðum meltutönkum til frekari meðferðar á Djúpavogi. Sé laxinn síðan að hluta seldur til manneldis hér innanlands en að mestu til útlanda.

Það er svokölluð laxaflensa, blóðþorri, sem kom upp á Austfjörðum.

Í bréfi frá sérgreinalækni dýralækna hjá Matvælastofnun, sem Fréttablaðið hefur undir höndum, segir: „Sláturfiskur til manneldis fer allur ferskur, slægður, ísaður og pakkaður beint á markað. Nánast allur lax úr Reyðarfirði fer á erlendan markað, aðallega Bandaríkin en einnig á Evrópumarkað (s.s. Frakkland, Pólland, Holland og Portúgal) og síðan verður eitthvert lítilræði eftir á heimamarkaði.“

Einnig kemur fram í bréfinu að veiran sé skaðlaus mönnum og dreifist ekki með slægðum fiskafurðum.