CNN skýrir frá þessu og hefur eftir heimildarmönnum sem þekkja vel til upplýsinga sem bandarískar og aðrar vestrænar leyniþjónustustofnanir búa yfir.
Úkraínumenn eru að verða búnir með þau skotfæri frá Sovéttímanum sem þeir áttu eftir en þau henta gömlum vopnum. Þeir grátbiðja Vesturlönd um að senda meira af vopnum og skotfærum og þá sérstaklega þungavopnum því Rússar hafa mjakast áfram í sókn sinni í austurhluta landsins að undanförnu vegna þeirra yfirburða sem þeir hafa varðandi þungavopn, þá aðallega stórskotalið.
CNN segir að staðan núna geti knúið Vesturlönd til að taka erfiða ákvörðun. Þau hafi fram að þessu stutt við Úkraínu þrátt fyrir sífellt aukinn kostnað fyrir efnahagslífið heima fyrir og að gengið hafi verið á vopnabirgðir þeirra sjálfra.
Lloyd Austin, varnarmálaráðherra Bandaríkjanna, stýrir fundi vinnuhóps tæplega 50 ríkja í dag þar sem málefni Úkraínu verða rædd. Reiknað er með að í tengslum við fundinn muni Bandaríkin tilkynna um enn fleiri vopnasendingar til Úkraínu.
Háttsettur embættismaður hjá NATÓ sagði í samtali við CNN að hann telji að stríðið sé nú að komast á það stig þar sem annar hvor aðilinn nær árangri. Annað hvort muni Rússar ná Slovyansk og Kramatorsk eða þá að Úkraínumönnum muni takast að stöðva þá þar. Ef það takist þá muni það skipta miklu máli.
CNN segir að vestrænir embættismenn fylgist nú náið með þremur hugsanlegum sviðsmyndum sem þeir telja að geta átt sér stað varðandi niðurstöðu stríðsins.
Rússar gætu haldið áfram að leggja úkraínskt landsvæði undir sig í Donbas.
Einhverskonar þrátefli gæti komið upp við víglínurnar sem myndi gera að verkum að stríðið haldi áfram mánuðum eða árum saman. Þetta muni hafa í för með sér mikið mannfall hjá báðum aðilum og halda áfram að hafa neikvæð áhrif á efnahagslíf heimsins.
Þriðja sviðsmyndin, sem talin er ólíklegust, er að Rússar endurskilgreini markmið sín með stríðinu, tilkynni að þeir hafi náð því sem þeir vildu og reyni að binda endi á átökin. Þetta er þó eiginlega ekki meira en óskhyggja að mati heimildarmanna CNN.
Bandarískir embættismenn eru sagðir óttast að ef Rússum takist að halda því landi sem þeir hafa lagt undir sig í austurhluta Úkraínu geti Pútín notað það síðar til að hefja aðra sókn, lengra inn í Úkraínu.
