Bandaríkin opnuðu sendiráð sitt í Kyiv nýlega aftur en því var lokað í upphafi stríðsins. Margir bandarískir embættismenn óttast að ef sérsveitarmenn verði sendir til Úkraínu muni það stigmagna stríðið en á hinn bóginn vilja þeir einnig tryggja öryggi sendiráðsstarfsmanna. Ef ráðist væri á sendiráðið yrði það hörmulegt fyrir Bandaríkin að þeirra mati.
CNN og Wall Street Journal segja að þessar hugmyndir og umræður séu aðeins á byrjunarstigi og hafi ekki verið kynntar fyrir Joe Biden, forseta, né Lloyd Austin, varnarmálaráðherra, sem hafa lokaorðið um hvaða öryggisráðstafanir á að gera við sendiráðið í Kyiv.
Embættismenn sögðu í samtali við CNN og Wall Street Journal að ekki sé óttast að Rússar geri beina árás á sendiráðið ef hermenn verða þar. Hins vegar gæti atburðarásin orðið mjög dramatísk ef til dæmis flugskeyti lendir á sendiráðsbyggingunni. Í versta falli geti orðið erfitt að koma starfsfólkinu frá Kyiv og í öryggi í Póllandi.
Eins og er eru það starfsmenn utanríkisþjónustunnar sem sjá um öryggisgæsluna að sögn CNN. Yfirleitt eru einnig nokkrir hermenn í sendiráðum Bandaríkjanna en nú er sem sagt verið að íhuga hvort senda eigi sérsveitarmenn til að sinna gæslu í og við sendiráðið.
Joe Biden hefur sagt að ekki komi til greina að senda hermenn til Úkraínu því það geti orðið til þess að átökin stigmagnist, sérstaklega ef bandarískir hermenn lenda í beinum átökum við rússneska. Í versta tilfelli geti það orðið til þess að NATÓ dragist inn í stríðið og hugsanlega verði kjarnorkuvopnum beitt.
Nú stendur Biden frammi fyrir erfiðri ákvörðun. Hvernig er hægt að vernda starfsfólk sendiráðsins, sem er á átakasvæði, ef ekki er hægt að nota hermenn til þess?