Þessa stundina sitja fimm í gæsluvarðhaldi eftir aðgerðir sem lögreglan á höfuðborgarsvæðinu fór í gegn skipulagðri brotastarfsemi fyrir helgi. Þetta kemur fram í yfirlýsingu sem lögreglan sendi á fjölmiðla í dag.
Lagt var hald á umtalsvert magn af marijúana, um 40 kíló, en leitað var á allmörgum stöðum, bæði í húsum og ökutækjum. Um var að ræða aðgerðir gegn framleiðslu, sölu og dreifingu fíkniefna, auk peningaþvættis. Lögreglan lagði einnig hald á ökutæki, peninga og tölvubúnað.
Nokkrir tugir lögreglumanna tóku þátt í aðgerðunum. Lögreglan á höfuðborgarsvæðinu naut aðstoðar sérsveitar ríkislögreglustjóra og lögreglunnar á Suðurlandi.
Alls voru tíu manns handteknir vegna rannsóknarinnar og fimm þeirra úrskurðaðir í gæsluvarðhald til tveggja vikna. Rannsókn málsins miðar vel samkvæmt lögreglu.
