Fréttablaðið skýrir frá þessu í dag. Fram kemur að starfsfólki fyrirtækisins hafi fjölgað úr 50 í 370 á síðustu tveimur árum. Haft er eftir Sigríði Mogensen, sviðsstjóra hjá Samtökum iðnaðarins, að hún heyri sögur sem þessar nær daglega frá fyrirtækjum í hugverkaiðnaði.
Hún sagði að nokkur fyrirtæki hafi nú þegar flutt sig til annarra Evrópuríkja vegna þessa. „Við höfum verið að vekja athygli stjórnvalda á stöðunni. Þetta er að gerast mjög hratt um þessar mundir,“ sagði hún.
Hún sagði þetta aðallega vera lúxusvandamál og um leið tækifæri: „Staðreyndin er sú að við erum í alþjóðlegri samkeppni um hæfileikaríkt fólk. Til að standa undir öflugu atvinnulífi. Við verðum að bregðast hratt við og liðka fyrir komu erlendra sérfræðinga til landsins. Þetta er gríðarlega brýnt efnahagsmál.”
