Eyþór Kamban Þrastarson og eiginkona hans, Emily Pylarinou, eru komin til Kaupmannahafnar ásamt barnungri dóttur sinni. Fréttablaðið greinir frá. Framundan er svo flug til Íslands sem verður mikil gleðistund fyrir fjölskylduna eftir erfiða baráttu við SAS-flugfélagið. Eyþór og Emily eru bæði blind og eru búsett í Grikklandi.

Sjá einnig: Eyþór og Emily fengu ekki að fljúga með barnið sitt til Íslands því þau eru bæði blind – „Ég held að þetta sé kolólöglegt“

Samlandi bjargaði málunum

Í síðustu viku var þeim meinaður aðgangur í flug SAS rétt fyrir brottför, eftir að hafa farið í gegnum innritun og öryggisleit á flugvellinum í Aþenu. Var um að ræða geðþóttaákvörðun flugmanns vélarinnar sem sagði að um öryggisbrest væri að ræða, eitthvað sem Eyþór segist ekki geta fundið neitt um í reglum flugfélagsins. Um var að ræða afar niðurlægjandi stund fyrir fjölskylduna sem að þurfti frá að hverfa og hefur síðan staðið í stappi við skandinavíska flugfélagið.

SAS gaf sig ekki með að Eyþór og Emily þyrftu aðstoðarmanneskju með sér í flugið og standa sjálf straum af þeim kostnaði. Blessunarlega fannst þó ákveðin örþjóðarlausn þegar í ljós kom að ókunnug íslensk kona var á leið í sama flug frá Aþenu og gat tekið að sér hlutverkið sem SAS krafðist.

„Við gátum fengið SAS með herkjum til þess að endur­bóka okkur í þetta flug, með þessa konu sem „safe­ty assistant“ eins og þau kalla það, sem er orð sem ég hef ekki séð neins staðar annars staðar heldur en í þessum sam­skiptum við SAS,“ segir Ey­þór í samtali við Fréttablaðið.

Skoða málsókn alvarlega

Málinu er þó ekki lokið enda íhugi fjölskyldan málsókn gegn flugfélaginu enda aldrei upplifað aðra eins mismunin.

„Það verður skoðað mjög al­var­lega og verður á­reiðan­lega gert. Þetta er ekki eitt­hvað sem við getum látið kyrrt liggja. Ég hef aldrei orðið fyrir svona aug­ljósri og greini­legri mis­munum á þeim grund­velli að sjá ekki,“ segir Ey­þór.

Hann bendir á að fimm ára börn megi fljúga ein, með aðstoð flugþjóna, en Eyþór og Emily máttu það ekki því að efast var um að þau gætu sett súrefnisgrímu á barnið þitt.  „Þessi öryggis­rök eru mjög skrítin miðað við hversu margar að­stæður eru til sem að geta haft á­hrif á hæfni þína til að bregðast við neyðar­að­stæðum,“ segir Ey­þór.

Þriggja vikna dvöl er framundan á Íslandi þar sem dóttur Eyþór og Emily fær í fyrsta sinn að hitta fjölskyldu sína á Íslandi. Framundan er síðan heimför og enn á eftir að leysa úr flækjunni varðandi það ferðalag.

Nánar er fjallað um málið á vef Fréttablaðsins