Undanfarið hafa skjáskot af samskiptum 31 árs konu við börn undir lögaldri gengið á milli fólks á samfélagsmiðlum. Skjáskotin hafa til að mynda vakið mikla athygli á TikTok en alvarlegar ásakanir á hendur konunnar hafa síðan komið upp. Í einu af skjáskotunum er konan til að mynda sökuð um að hafa beitt ungan dreng kynferðisofbeldi á klósetti í Kringlunni.

Konan gegndi trúnaðarstörfum hjá Samtökunum ’78 en hún hefur nú látið af störfum í kjölfar ásakananna. Álfur Birkir Bjarnason, formaður Samtakanna ’78, staðfestir þetta í samtali við mbl.is en málið er nú komið á borð lögreglu. Álfur segir að mál sem þessi fari í faglegt ferli eftir aðgerðaáætlun samtakanna gegn ofbeldi. Hann segist ekki geta rætt mál konunnar nánar.

Konan sem um ræðir starfaði í Skarðshlíðarskóla í Hafnarfirði í haust en vinnur þar ekki lengur. Ingibjörg Magnúsdóttir, skólastjóri Skarðshlíðarskóla, segir í samtali við mbl.is að ástæðurnar fyrir því tengist þó ekki ásökununum um ofbeldi og áreitni gegn börnum.